Tuesday 15 November 2011

Main chala...


Main chala hun aaj bahut duur
khud se duur, sabse duur
iss duniya se bekhabar...

Khair iss duniya ka kya karna
ghutghut ke jeena aur ghut ghut ke marna
na jeena hai ab mujhe, ek pal aur yahan...

Maa tu jab lori sunati thi
neend badi pyaari aati thi.
Maaf kardena mujhe maa
aaj ussi pyaari neend ki talaash mein jaa raha hun....

Behen tu hamesha mujhe hasati thi
par aaj ye saali zindagi har waqt
mujhe rulati hai.
Chahkar bhi na has pata hun yahan
aaj base chale jaa raha hun le jaayein ye kadam jahan....

Kuch der aur chalunga
fir thak kar kahin so jaunga.
Neend iss baar bahut pyaari hogi
maut sang ab meri yaari hogi....

Papa ne kaha tha
ki kahan kuch ban payega.
Keh dena unse ki aaj woh muskurayein
unka beta na aur ab unka naam dubayega....

Dost tujhe bola tha har waqt saath rahunga
maaf karna nahin socha tha
ki tujhse bhi kabhi kuch jhooth kahunga.
Ho sake toh yaad rakhlena
aur sun usko bas itna keh dena
pyaar usse bahut karta tha.....

Ma aaj aankhon se aansu tapak rahe hain
par aaj na ye kadam tham rahe hain.
Yaad teri bahut aa rahi hai ma
kya karun zindagi ye bahut sata rahi hai ma...

Ab aur na jee paunga
bas wahin nadi kinare apne
akhiri kuch pal bitaunga....

Wahin nadi pe hi toh ek pull hai
uspe har 1 ghante mein train aati hai
ussi ke saamne kood jaunga....

Ma aur behen, tum mat aana
mujhe kata hua na dekh paoge....

Maine tum sab ko bahut sataya tha
ma tumhe toh kitna jyaada rulaya tha.
Ab apne aansu ponch lena
apne aapko dilaasa dena
ab toh bas meri achchi yaadein hi hongi....

Maa ye paper thoda gila ho gaya hai
woh aansu kuch jyaada hi nikal gaye.
Kya karun pyaar tumse bahut karta hun
par jeene se bahut darta hun....

Suno ab mujhe jaana hoga
train aa rahi hai
uske neeche aana hoga...

Kehte hain pata nahin lagta
ki kab kat kar marr jaate hain.
Maa tum pareshaan na hona
mujhe bilkul dard nahin hoga.....

Bas yunhi kuch pal mein marr jaunga
ho sake toh agla janam lekar
milne kabhi aaunga...

Main chala.


(Fir uss khat ko peeche palat kar dekha tha maine) 

Chala hi toh gaya tha main, 
railgaadi bhi aayi thi. 
Na jaane fir kyun ruk gaya. 

Ek alag si sihran hui thi, 
laga jaise ek nayi aag
jagi hai iss seene mein. 

Agar aaj marr gaya toh, 
kya haasil karlunga main. 

Marke bhi toh ek failure hi kehlaunga, 
jeeke shayad kuch kar hi jaunga. 

Aur nahin bhi kar paaya toh, 
ek din toh marna hi hai. 
Toh fir kyun na kuch aur
ladaiyaan ladun, thoda aur muskura dun. 

Kuch duur aur fir chalunga 
aaj lagta hai ki kuch banunga. 
Marna badi aasaan hai dost, 
jeena hi toh asli khel hai. 

Dost intezaar kar rahe honge 
woh college ke bahar chai ki tapri pe. 
Bade din se toh unke saath chai bhi nahin pi. 

Aaj usse raat movie bhi dikhane le jaunga, 
kal interview bhi hai, shayad kuch baat ban jaaye. 

Khair na bhi bani toh kya, 
woh kehti hai main muskurata hun
toh sab khil khil sa jaata hai. 
Kya pata woh sach hi kehti ho. 

Zindagi mera intezaar kar,
main fir wapas aa raha hun. 

Main chala...

5 comments:

  1. Gave me goose bumps Abhinav!! :O

    ReplyDelete
  2. Wow!
    The first half of the poem brought tears in my eyes.
    The second half made me smile.
    Amazing talent you have! :)

    ReplyDelete
  3. The first half felt too familiar. Disturbing, which means its superb.

    ReplyDelete