15 din waali mohabbat...

15 din ka pyaar...

ya sapana tha woh? bolo.

Mujhe toh kuch nahin pata,

na hee kuch pata karna hai aaj...

Lagta hai abhi so kar utha hun,

par neend badi pyaari aayi thi.

Ek pari sang meri yaari thi,

ab toh woh gayi, bas ye ek hassi de gayi....

Achcha lagta hai aaj

ye 15 din ka pyaar, dosti ya tha kuch aur,

mujhe toh kuch nahin pata

na hee kuch pata karna hai aaj....

Uski awaaz, uske bolne ka salika

woh na chahte hue bhi mujhe daantna

aur fir daant kar aur jyaada pyaar jatana.

Ye sapna tha kya? bolo

Pata nahin achanak mil gayi thi

laga jaise kabse jaanta hun.

Fir ek din alvida keh kar boli

‘I will miss you’

Achcha laga tha,

bade dino baad koi sachcha laga tha....

Maine bhi toh miss kiya tha usse

aur fir dil ki baat bhi bol hi daali.

Pata chala aag dono taraf lagi hai,

lekin kuch tham se gaye the hum.

Par humare dil, woh bechare kab thame hain....

Kehti thi mujhe gaana sunao

fir sunte sunte so jaati thi.

Kabhi kehti so jao

aur khud gaake jagati rehti thi.

Pagal si thi woh, bilkul meri tarah...

Kehna chahta tha bahut kuch usse

nahin keh paaya par main.

Aaj chali gayi woh...

Keh rahi thi kuch din baad ayegi

par aise vaade kab pure hue hain.

Aur unn kuch din baad toh,

mera bhi kuch pata nahin hoga....

Hawa ki tarah udd jaunga

uski khusbu lekar apne seene mein.

Na jaane fir kab milenge

hum do ajanabi, iss bheed mein...

Milenge bhi ya nahin

Kya pata?

Mile bhi toh aise hi dil dhadkega

Kya pata?

Ye 15 din waali mohabbat

sahej ke rakhunga,

dil ke kisi kone mein

ek haseen sapne ki tarah.....

Suno,

Keh ke toh gayi hai ki aayegi

par chalo agar nahin bhi aayi,

Toh bhi ye 15 din waali mohabbat

zindagi bhar hasayegi.....

Ye alvida ek muskurahat waala

jo de kar gayi hai mujhe,

bas yehi dua hai jahan gayi ho woh,

mujhe yaad kar aise hi muskuraye...

Hum do pagal ajnabiyon ki

15 din waali mohabbat....