Bachelor Ka Kamra

Kisi kone mein pada guitar,

Ek kone mein pade earphones bekar,

Kapdon ka kuch pata nahin,

Bistar se geela tauliya, na jaane kabse hata nahin

Khidki par ek parda hai,

Chupane ke liye toote seeshe

Bed per ek sundar si chaadar bicha rakhi hai,

Chupane ke liye coffee ke purane daag

Diwaron par makdiyon ka jaise

Ek sheher bana hua hai,

Wahin bathroom ke kone mein maujood washbasin,

Na jaane kabse dhool se sana hua hai,

Wohi dhool jo jooton se kabhi utri thi,

Jab football khel kar waapas aaye the,

Woh maile joote aaj bhi, darwaze ke nazdeek pade

Roz Lakshmi ji ko door se namaskar karte hain

Kehta hai, 

"Ma na jaane kitne mahino se aayi nahin,

Jab aayengi toh unhi se sab saaf karaunga,

Abhi se kya kisi naukarani ko laga,

Befaltu mein hazaar paanchso main nahin udaunga"

Issi soch mein Pappu hamara,

Apne ghar ka ujjwal sitaara,

Har hafte unn bache rupiyon ka

Ek pizza khaata hai

Aur pizza ke bakse,

Wahin bistar ke neeche chupaata hai

"Arrey sardiyon mein kaam aate hain,

Woh bakse"

Apna koi ajeeb sa logic fir humein samjhaata hai,

Aur kharaab pade heater ki oor ishara kar bolta hai pappu,

Ki inhi bakso ko jalaakar hi toh woh thand ko duur bhagata hai

“Dustbin?” Arrey dekhiye yahin kahin pada hoga,

Na jaane kahin kisi kone mein ada hoga,

Istemaal nahin kiya, uth ke dusre kamre mein jaana padta hai,

Par kya karein, laptop se uth kar wahan tak jaana usse khoob akharta hai

Lekin Pappu hamara bachelor bada sayana hai,

Kehta hai, real zindagi mein safaai ka kya fayda

Bhaiya, Ab toh virtual zindagi ka dekho zamaana hai