Monday 31 October 2011

Pohe waali ladki.....


Ladki badi sayani thi
Par hum bhi kahan kam the
College ke din the
Aur pune mein baarish ke mausam the.....

Roz tadke nikal padte the sadko par
Sab yaar Subah 4 baje poha khane
Aati thi who bhi wahin
Jaata tha jise main taadne ke bahane.....

Ek roz hua yun
Humein dekh muskurayi thi woh
Kasam se kehta hun
Uss din badal ne baarish ki pehli boond
Humhi par barsayi thi dost.....

Aur fir shuru hua woh silsila
Nazron ke milne ka...

Doston ki bheed mein chori chupe
Ek dusre ko dekh muskurate the
Pohe ki mahak ke sang apni dil ki baat keh jaate the.....

Aur fir socha tha ki
Sadak ke beech ka fasla mita diya jaye
Kuch kadam who chali
Kuch kadam main....

Bas abhi kuchi duur toh reh gaye the hum
Doston ki goonjti awaazon ke paar
Befikr se jab chale the hum....

Hosh mein rehkar bhi hosh kho baithe the jab
Apni iss kahani ke chakkar mein
Road pe side dekhna bhool gaye the tab....

Abhi kal hi gaya tha fir poha khane
Laga tha jaise dekh fir muskurayi thi woh
Fir yaad aaya ki uss din humari wajah se hi toh
Truck ke saamne aayi thi woh...

1 comment: