Pados waali item....

Naye naye flat mein shift hue the

Mann mein thi khwahishein kayi saari

Unme se ek thi,

Ki koi sundar ladki bhi ho padosi hamaari....

Flat toh khair kaafi achcha tha

Broker bhi kaafi sachcha tha....

Samaan set kar bistar par jaise hi baithe the

Kambakhat bijli hi udd gayi

Aur tabhi hamari nazar

Kamre ki French window par padh gayi.....

33 Crore bhagwaan ko yaad kar

Khola tha khidki ko jaise hi...

Umeed reh gayi dhari ki dhari saari

Jo dikhi saamne khunte se bandhi ek bhains bechari.....

“kamina tabele ke pados waala ghar pakda gaya”

Bola tha ye Abhinav bechara

Par kya kare koi

Ab toh bitaana tha uss bhains sang saal saara....

Roz subah khidki ke saamne khade woh muskurati thi

Mujhe breakfast karte dekh apna gobar girati thi...

Uski awaaz se mere doston ki toli

Thar tharrati thi

Par subah theek 6 baje

Apna alarm woh  hamesha bajaati thi....

Roz thaka haara jab college se aata

Toh hamesha usse apni taraf dekhte hue paata

Dum hilaati welcome karti thi mujhe

Shayad poochti hogi

Aaj main kaisi lag rahi hun tujhe....

Fir jab hua saal poora

Chod diya tha who flat maine

Par yaad hai mujhe woh aakhri din

Jab usse milne gaya tha tabele mein main...

Firse poonch hila rahi thi

Shayad paas apne bula rahi thi

Jaake usko bola tha main

Ki ab bas kuch der mein nikal jaunga

Shayad tumse milne ab

Kabhi na aaunga....

Aankhon mein naa jaane kyun

Aa gaye the uske aansu

Bola tha room mate mujhe

Kyun ek bhains ke saath hi

Dosti kar baitha tu.....

Ab toh flat bhi naya hai

Aur ek girlfriend bhi hai

Ab toh harr samay khush rehta hun

Na hai koi gamm...

Par fir bhi kabhi kabhar

Yaad aa jaati hai woh,

Pados waali item.....