Woh sheher Nainital ka....

Aaj fir yaad mein dooba hun,

unn dino ki jo yunhi guzar gaye.

Uss shahar ki

jahan kabhi jaana bas majboori

lagta tha

Woh sheher Nainital ka......

Lagta tha ki

aur kisi hill station nahin ja sakte

toh chalo Nainital hi chal lete hain.

Pass mein hi toh hai

shaam tak aa jayenge....

Ubb sa jaata tha tab main

kitna bewakoof tha main.

Na dekh paata tha uss

khoobsurat nazaaron ko

Unn khoobsurat logon ko

aur uss khoobsurat Nainital ko....

Aaj yahan pune mein hun

aaj kahan balki pichle 5 saal se.

Ab toh yehi sheher apna lagta hai

woh chota sa Kashipur toh bas

ek sapna lagta hai....

Aaj bhi har waqt dil karta hai

ki jaldi kuch ban jaun,

thode paise kamaun,

fir jaunga wahan.

Khoob masti karunga

aur maa ko bhi ghumane le jaunga

wahin Nainital jaunga....

Ek baar fir Mall road pe khada

hokar, garam coffee ki chuski lunga.

Jheel ke upar se aati thandi hawa,

fir chehre ko chukar nikal jayegi.

Ek sihran si hogi, wohi jo pehle hoti thi....

Saamne jheel ko dekhta rahunga

mall road pe khade hoke.

Woh ek bookstore hai wahin,

ussi ke chaukhat pe khade hoke,

haath mein firse ek cup coffee ka hoga.....

Fir mann toh hai ki boating bhi karun

iss baar pucca paddle boating karunga.

Hamesha darr lagta tha mujhe paddle boating se,

lagta tha doob jaunga.

Par buri baat kya hai,

dooba bhi toh apni,

sabse pasandeeda jheel mein hi samaunga,

kisse milti hai aisi kismat.

Hehe, dekha darr aaj bhi hai...

Tab toh pitaji bhi the

humein scooter par le jaate the Nainital.

tadke nikla karte the.

Aur raaste mein woh kaladhungi ke,

Jim Corbett museum se lekar,

Nainital ke Manu maharani tak,

bas deodar aur cheed se dhaki hoti thi sadke....

October mein bhi toh jaate the,

scooter par baith kar.

Fir achchanak pitaji scooter rokte the

aur kehte the,

woh dekh hare hare patton par,

safed safed baraf jami hai.

Main uss baraf ko dekhta aur sochta

ki kabhi snowfall dekhunga Nainital mein....

Iss baar pucca jaunga

january mein jaunga

2 mahine hi toh door hai.

Iss baar baraf mein khoob khelunga

woh snowman bhi banaunga.

Suna hai bada mazaa aata hai

iss baar saare maze uthaunga

iss baar Nainital zaroor jaunga....

Woh pahaadi sheher Nainital ka

aaj bhi roz yaad aata hai ....