Chalo ek naya bhagwan banayein....

Chalo ek naya bhagwan banayein

chalo ek naya shaitaan jagayein

chalo fir inn bewakoofon pe apna haq jamayein....

Lad lad ke mar gaye ye

uss bhagwaan ke liye

jo kabhi banaya tha humne.....

Inhe kya pata ki bhagwaan

toh ek zariya hai.

Apni shaktiyon ko inn pyaadon par

sthapit karne ka...

Chalo aaj fir ek naya bhagwaan banayein

inn par thoda aur hukum chalayein

apni shatranj ka inhe mohra banayein....

Jalayenge ye khud ko aur apne jaison ko

rulayenge ye apni zindagi ko.

Baithe rahenge hum yahan

haste rahenge inko dekh kar...

Banayein ek naya manoranjan inke liye

dooba dein pura inko usme.

Fir banayein inse aur shaktishaali mohre

thoda mazaa toh aaye fir iss shatranj mein...

Iss takat ki shatranj

jiske koi kayede kanoon nahin

bas wohi kayda aur kanoon hai

jo humne banaya hai....

Aao chalo inn kayde kanoonon

ko tod kar ek naya kayda banayein.

Inn ko kuch aur tadapta dekh

aaj fir thahaka lagayein....

Chalo ek naya bhagwan banayein

chalo ek naya shaitaan jagayein

chalo fir inn bewakoofon pe apna haq jamayein....