Kahaani kuch dino ki

Ab yunhi mohabbat ki hai, 

log kehte hain sharaarat ki hai, 

Main kehta hun, 

Teri ibaadat ki hai, 

Ek baar fir, 

Naa jaane kitne khudaaon ko rutha kar, 

EK nayi aadat ki hai ...

Pehli baar mila tha tujhse

Sardiyon ke ek din... 

Tujhe fir jaana tha, 

Tujhme khud ko maine fir pehchaana tha, 

Tum Jaise ek kahaani thi, 

Aur tumhe dharaa maan, 

Apni bhi ek likhti jaani thi ... 

Aur jab doosri baar mila, 

Toh Dekha tha tumhe,

muskuraate hue...

Maano tabaah sheher fir muskuraane lage,

Soye hue fakir fir gungunaane lage,

Halchal kabron mein bhi machi thi,

Charon taraf machi ek khusnuma khalbali thi...

Bhoot sakpakaye,

Poochein unki basti mein ye pari kaun aayi thi,

khandaron mein nayi hawaayein jo layi thi,

Jinn bhi hairaan pareshaan ghoome the,

Aur kayi puraane kisse uss shaam fir jhoome the...

Ek kissa tumhara bhi tha,

Jo zabaan par daba reh gaya,

Fir dhalta suraj kuch aur laal hua tha,

Tab mere dil ko yahi khayaal hua tha,

Jab dekh tha tumhe,

muskuraate hue ...

Fir teesri baar woh ek kissa, 

aur na daba paaya tha, 

woh ek gaana tha, 

Puraana sa, 

Tujhse dil laga kar, 

Uss gaane ka matlab ab samajh aaya tha ... 

Khush tha main kitna,

yaad hai tumhe? 

Shaam thi, 

Chehelpehel thi, 

Sheher purana fir naya tha, 

Mera haath thaam tum chali jaa rahi thi, 

Baat na jaane kitni kahe jaa rahi thi, 

Main sunta tha, 

Muskurata tha, 

Fir tum meri poochti, 

Aur ek tak nihaar sab sunti jaati,

Kaun sunta hai aise mujhe, 

Kyun sunti ho aise mujhe, 

"Achcha lagta hai, tumhe sunte jaane" 

Itna keh muskura deti... 

Fir chauthi baar mila, 

Ek kitaab liye baitha tha, 

Ussi ke peeche se 

na jaane kaise nikal kar aayi thi tum, 

Khud ek kitaab ban, 

Mera, Uss kitaab ko padhne ko jee karta hai aaj, 

Uss kitaab ki har kahaani, 

Har kissa, 

Uss kitaab ki har nishaani, 

Har hissa, 

Padhne ko jee kata hai... 

Kitaab ke har panne par likhe, 

Har khwaab,

Har dard, 

Har muskurahat, 

Har beeti raat ki tilmilahat, 

Har nayi subah ki pehli aahat, 

Padhne ko jee karta hai...

kitaab mein chipe raaz, 

uske alag alag andaaz, 

Padne ko jee karta hai... 

Jo aansoo ki kuch, 

boondein dabi hain usme, 

Unhe sehla kar mita dene ka jee karta hai...

Aur kabhi ji karta hai uss kitaab ko

liye baitha rahun, 

Usse dekhun, 

Fir sochun, 

Ki iss kitaab mein aisi kya khasiyat hai,

Jo isse harr baar padhne ka jeet karta hai... 

Fir muskuraun, 

Aur kuch panne palat jaun, 

Jo Tumhe padhne ko aaj fir jee karta hai...

Fir kayi aur baar mila..

Kabhi inhi sadkon par, 

Kabhi sapno mein, 

Aur ek shaam kal ki bhi thi... 

Tum thodi naraaz thi, 

mujhse nahin, 

Iss zindagi se, 

Aur main bas har lamha, 

tumhe churaane ko ji banaa raha tha, 

Inn sabse, 

Kahin duur le jaane ko ji banaa raha tha, 

Inn sabse, 

Le jaata, 

Agar fir jo haath thaam leti, 

Par khud mein hi itni khoyi thi tum, 

Ki shayad mujhe bhool gayi thi, 

Tumhari harr jhunjhlahat, chillahat piye jaa raha tha, 

Aur isi soch mein jiye jaa raha tha, 

Ki ek pal mudkar dekhogi, 

Muskuraogi, 

Par,

Har pal sapna thodi na hota hai, 

Aur agar sapna bhi ho,

Toh Woh apna thodi na hota hai ... 

Fir shaam zara chup si nikal gayi, 

Aur tumhaare jaane ka samay hua tha, 

Tumhe rok main poocha, 

"Suno agle hafte milogi?" 

"Nahin agle hafte toh nahin ho payega?" 

"Kyun?" 

Ye prashn mere zehen se toot, 

Jaise uss lamhe mein ghul gaya tha, 

Main jawaab ke intezaar mein, 

Tumhe dekhe jaa raha tha, 

uss pal mein na jaane, 

Kitni khwaahishein sameta, 

Khud ko paa raha tha 

Fir dheeme se tumne bola, 

"Agle hafte shaadi ke liye ladka dekhne jaana hai." 

Neend nahin aayi kal raat, 

Jaise sapna har toota tha, 

Har katra uski muskurahat ka, 

Jaise meri hatheliyon se choota tha, 

Fir phone baja mera, 

Ussi ka tha... 

Ek pal ke liye man kiya, 

Na uthaun, 

Kambal taan so jaun, 

Kya rakha hai pyaar mein, 

Bas ek khuda hai jo kabhi kabhi rooth jaata hai, 

Aur ek mera dil hai, 

Saala hamesha toot jaata hai ... 

Par fir bhi, 

khud ki rok na paaya, 

"Suno Abhinav, ek kaam karoge?" 

"Haan bolo?" 

"MUjhe bhaga le jao..." 

"kya?"

Haan,

Nahin raha jaata aise, 

Ghut ghut ke, 

Chura le jaao, 

inn sabse, 

Suno, tum aaoge na? 

Apne sang le jaaoge na? 

Itna ghumte ho, 

Mujhe bhi ghuma lao, 

Hamesha ke liye, 

Kahin pahaadon par jayenge,

Wahin bas jayenge, 

Tum kitaabein likhna, 

Main padhungi, 

Ab darr lagta hai, 

Mujhe inn sabse, 

Sab jaise khaane ko daudte hain, 

Bas tumhare sang jo lamhe beete hain, 

Wohi inn sabse bachaane ko daudte hain... 

Bolo,

Aaj yehi ek sapna dekhti hun,

Isse apna karoge?